Mayın 2-də Nizami rayonu ərazisində bir neçə gün öncə qəddarlıqla qətlə yetirilən XI sinif şagirdi Aytac Babayevanın ölümünə etiraz olaraq aksiya keçirilib.

Azad.Az Virtualaz.org-a istinadən xəbər verir ki, metronun “Qara Qarayev” stansiyasının yaxınlığında keçirilmiş aksiyada 30-dan artıq gənc iştirak edib.

Əraziyə polis və mülki geyimli şəxslər gəlib. Polislər cəmi bir neçə dəqiqə davam edən aksiya iştirakçılarını ərazidən uzaqlaşdırıblar. Jurnalistlərə isə aksiya iştirakçılarına yaxınlaşmağa icazə verilməyib.

Qeyd edək ki, aksiya ilə bağlı facebook sosial şəbəkəsində yaradılan “Qadınları öldürməyin” adlı səhifədə də çağırışlar edilib. Sosial şəbəkədə virtual aksiyaya da start verilib.

Virtuala aksiyaya “Təmiz Dünya” Qadınlara Yardım İctimai Birliyinin sədri Mehriban Zeynalova, Azərbaycan Uşaqlar Birliyinin sədri Kəmalə Ağazadə və digər hüquq müdafiəçiləri də qatılıblar.

Müraciətdə deyilir: “Bir ailənin övladı bir gənc tərəfindən qətlə yetirilib. Avropa Oyunlarını tənqid etmək əvəzinə insan həyatına da bir qədər diqqət yetirin.

XI sinif şagirdi Aytac Babayevanın ömrünün baharında, ilin bahar günündə öldürülməsinə susmayın. Aytac ilk deyil. Bundan əvvəl də yuxu görüb həyat yoldaşının başını kəsən vardı. Kriminal hadisələr, qadına qarşı şiddət, zorlamalar, döyülmələr, qətllər - bunların hamısı getdikcə artır və təhlükəli tendensiyadan xəbər verir.

20 yaşında bir oğlanın XI sinfi də bitirməmiş bir qızcığaza bu qədər vəhşi davranması böyük bir SOS siqnalıdır. Cibində bıçaq gəzdirən oğlanlar doğmalarımızın, yaxınlarımızın, dostlarımızın və həm də özümüzün həyatı üçün təhlükəlidir”.